Tuesday, October 16, 2012

வீழ்ச்சி

தலைவர் கை
தண்ணீர் குடித்தும்

தலைமுறை தலைமுறையாய்
தீர்ப்புக்கும் தீர்வுக்கும்
சாட்சியாய் சமைந்தும்

வெட்டினால் வேல்கம்பு
வீழ்த்தினால் விறகு என
வீர முழக்கமிட்டும்

ஊராரின் விலாசத்தில்
ஒரு வரியாகியும்

சாதல் காதல் மோதல்
சலிக்காது கண்டும்

தறி கெட்டு ஓடி
பொருதி மாண்டாரோடு
பொறுமை காத்து
புகைப்படத்திற்கு நின்றும்

செத்தோரை எண்ணும்
செய்தி இல்லா
செய்தித்தாளில்

பிழைத்தோர் கணக்கில்
வரவு வைக்கப்பட்டும்

வெறும் நிழல்
வெந்தழல்
வேறுபாடு வலியுறுத்தியும்

காலம் காலமாக
கல்லடி கண்டும்
காற்று சாதகமாகும் என
காயத்தை காயவிட்டும்

மஞ்சள் குங்குமத்தோடு
மங்களகரமாய்
கண்டிராக் கூட்டம்
பெண்டிராய் துதித்தும்

கல்யாண வரன்
கைக்கு காசு
ரோடு டெண்டர் என

மஞ்சள் துணியில்
மடித்த மசோதாவை
மடியில் தாங்கியும்

பாட்டில் போற்றப் பட்டும்
ஏட்டில் ஏற்றப் பட்டும்

அரசளித்த எண்ணை
அனுதினம் அணிந்தும்

முதியோர் விடுதிக்கா ?
மனநல விடுதிக்கா என
விலை பேசப்பட்டு

துயரில் துக்கித்தது
தானே புயலில்
தானாய் வீழ்ந்த மரம் !

0 Comments:

Post a Comment

Subscribe to Post Comments [Atom]

Links to this post:

Create a Link

<< Home